Toki Tampijang (Kewel Boger deng Tua)

Basudara tuang hati jantong!

Boger nih burung gareja. Kalu Tua tuh antua tuagama tuh jua.

Ini dong dua sabang hari dudu kewel slak par slak.

Boger : Tua, tua e. Tua….

Tua tar dengar. Boger dalang hati, tua nih talingang ada pono tagal baru kaluar dari akang toreng nih jua. Boger lia pas Tua dudu di ujung bangko, langsung dia dudu pas di bangko sablah muka.

Tua : (skrek tarbae paskali) Se nih,

Boger : eh itu sa mo Tua skrek parsis ada lia setang papua bagitu

Dong dua tatawa

Tua : beta nih ada pikir pikir, akang kampinjang nih macang babunyi sondor bagus

Boger : barang mangapa Tua?

Tua : (Tua seng balas, maar macang ada pikir laeng)

Boger : beta deng tamang-tamang rasa akang babunyi bagus mo. Tua saja yang talingang su tar bagus kapa. Tadi sa beta panggel-panggel Tua tar manyao.

Tua : kalu akang babunyi bagus, mangapa sabang beta toki kamong lari kaluar toreng?

Boger : mo musti kaluar te

Tua : batul toh, pasti tagal kampinjang babunyi su tar bagus toh?

Boger : Tua e, mau kas kaluar kata tuh pikir babae.

Tua : iyo toh. Kamong lari kaluar, la se lia, jemaat jua seng iko akang pung suara par pi kumpulang

Boger : haa…dengar e, beta kas tau mangapa kalu tua goyang kampinjang katong kaluar e

Tua : iyo mangapa?

Boger : katong pi kumpulang. Pi cari makanang, tarbang sama sama kuliling kintal gareja nih.

Tua : oh beta kira kamong seng suka akang babunyi.

Boger : suka tua, kalu tarsuka katong su pi kas tinggal toreng dar oras katong orang tatua lai.

Tua : iyo e. Beta harap jemaat jua suka dengar akang babunyi jua.

Lalu dong dua dudua carita tarus sampe mati mati galap, la Boger maso sono dalang toreng. Tua bale ka rumah.

Be Sociable, Share!

Tinggalkan Balasan

Alamat surel Anda tidak akan dipublikasikan. Ruas yang wajib ditandai *